შეხვედრები დიპლომატებთან კავკასიურ სახლში – პირველი შეხვედრა

„კავკასიურ სახლში“ დაიწყო საჯარო დისკუსიების ციკლი „შეხვედრები დიპლომატებთან კავკასიურ სახლში“. შეხვედრები იმართება საქართველოში აკრედიტებული დიპლომატიური კორპუსებისა და საერთაშორისო ორგანიზაციების წარმომადგენლებთან.

21 ივნისს პირველი შეხვედრა გაიმართა თურქეთის რესპუბლიკის საგანგებო და სრულუფლებიან ელჩთან საქართველოში, ზაქი ლევენთ გუმრუქჩუსთან.

ბატონმა გუმრუქჩუმ განიხილა საერთაშორისო პოლიტიკაში მიმდინარე ტენდენციები ცივი ომის დასრულებიდან დღემდე და ხაზი გაუსვა, რომ სამხრეთ კავკასიის რეგიონს მსოფლიო უსაფრთხოების დღის წესრიგში სათანადო ყურადღება არ ექცეოდა,  რაც  შეცდომა იყო. ძირითადი აქცენტი გადატანილი იყო ჯერ აღმოსავლეთ და ცენტრალურ ევროპაზე, ხოლო 2011 წლის შემდეგ, – ცენტრალურ აზიასა და ახლო აღმოსავლეთზე. ასეთ ვითარებაში კი, სამხრეთ კავკასიის რეგიონში მიმდინარე პროცესები ყურადღების მიღმა დარჩა. პუტინის ხელისუფლებაში მოსვლის შემდეგ, რუსეთის პოლიტიკა სამეზობლოში უფრო აგრესიული გახდა, თუმცა არც 2008 წლის აგვისტოს ომის დროს და არც 2014 წელს უკრაინაში განვითარებული მოვლენების შემდეგ, დასავლეთის პასუხი ამ აგრესიაზე შესაბამისი არ იყო. ასევე აღინიშნა, რომ აგვისტოს მოვლენებზე დასავლეთის ადეკვატური პასუხის შემთხვევაში, შესაძლოა, უკრაინაში ვითარება არ გამწვავებულიყო. ამავე დროს ელჩმა შენიშნა, რომ რუსეთთან დიალოგი აუცილებელია, თუმცა ეს არ უნდა ნიშნავდეს აგრესიის იგნორირებას. სრული ტექსტი.

Comments

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *