მეტი ნატო საქართველოში

ლაშა მარკოზაშვილი
მკვლევარი, ადამ მიცკევიჩის უნივერსიტეტი, პოზნანი, “კავკასიური სახლის” მოწვეული ექსპერტი

მნიშვნელობა

ნატოში ინტეგრაციას აქვს ორი მხარე, ტექნიკური და პოლიტიკური. საწვრთნელი ცენტრის გახსნა მნიშვნელოვანი ტექნიკური ნაბიჯია. როგორც წესი მსგავსი სააგენტოები ემსახურებიან არა მხოლოდ პირველად მიზანს, დამატებითი ფუნქცია სოციალურია და კონკრეტული საზოგადოებრივი ჯგუფების ინტეგრაციას უწყობს ხელს. ერთია, როდესაც ჩვენი სამხედროები დადიან ნატოს მისიების ფარგლებში საზღვარგარეთ, მეორე როცა ჩვენ ვქმნით მასპინძლობის მუდმივ ბაზას. გავიხსენოთ გენერალური მდივნის სიტყვები, სტოლტენბერგმა ცხადად გამიჯნა ორი მიმართულება: საქართველო ნატოში და ნატო საქართველოში.

დრო

ნატოს მიერ ინტეგრაციის პროცესის ტექნიკური ნაწილის წახალისება შეიძლება გავიგოთ როგორც უელსის სამიტის კომპენსაცია, სადაც კვლავაც ვერ მოხერხდა პოლიტიკური გადაწყვეტილების მიღება. ასეა თუ ისე, მომდევნო ნაბიჯი გადაიდგა, მნიშვნელოვანია საქართველო იყოს მომთხოვნი  პარტნიორებისადმი, პროცესის სწორი გაგება გადამწყვეტი იქნება სასურველი შედეგის მისაღებად.  სამხედრო ინტეგრაცია ვერ გაგრძელდება სამუდამოდ, დადგება მომენტი, როდესაც ალიანსს აღარ ექნება საშუალება პოლიტიკურ შეკითხვებს ტექნიკური პასუხები დაახვედროს,  ჩვენი მთავარი ამოცანაა მოვემზადოთ ამ მომენტისთვის.

რუსეთი

რასაკვირველია, მთავარი ხელისშემშლელი ფაქტორი რუსეთია. ჩვენ მუდმივად გვაინტერესებს რა რეაქცია ექნება კრემლს დასავლეთიდან გადადგმულ, ამა თუ იმ ნაბიჯზე. რეაგირება როგორც წესი მყისიერია. ახლად გახსნილი ცენტრი, ჩრდილოეთიდან უკვე არაერთხელ შეაფასეს, როგორც დასავლური პროვოკაცია. რუსეთს, გამომდინარე მოცემულობიდან, შეუძლია აირჩიოს ორი პრაქტიკული გზა. პირველი, დაგეგმოს პროვოკაციები საქართველოს ტერიტორიაზე, საქართველოს მთავრობის და დასავლელი პარტნიორების კიდევ ერთხელ გამოსაცდელად. მეორე, დაელოდოს ცენტრის ამუშავებას, შეაფასოს შუალედური შედეგები და ამის მიხედვით გადაწყვიტოს, ღირს თუ არა დამატებითი ზომების მიღება. პირველი გზის არჩევა კრემლს გაუჭირდება, უკრაინის მოვლენები, რთული ვითარება სეპარატისტულ რეგიონებში და საქართველოს მთავრობის ხშირ შემთხვევაში ზომიერი პოლიტიკა, ოპერაციის დაგეგმვას გაართულებს. მეორე გზა უფრო რაციონალურია, ამდენად მეტად სავარაუდო.

დასკვნა

ნატო საქარველოს წვრთნისა და შეფასების ცენტრის გახსნა კიდევ ერთხელ ამოწმებს ურთიერთობის ორმხრივ დინამიკას. ინსტიტუტის წარმატებული მუშაობა დაეხმარება არა მხოლოდ საქართველოს; ცენტრის კარი ღიაა, როგორც ალიანსის წევრებისთვის, ისე პარტნიორი ქვეყნებისთვის. მნიშვნელოვანია, რომ ცენტრში მოხდება არა მხოლოდ პირადი გამოცდილებების გაზიარება, არამედ საერთო გამოცდილების შექმნა. საერთო გამოცდილება გულისხმობს, წამოჭრილი პრობლემების ერთად გადალახვას, ნატომ უნდა შეძლოს, უსაფრთხოების გამოწვევები ბრძოლის ველიდან პოლიტიკურ არენაზე გადაიტანოს, მხოლოდ ასე გახდება შესაძლებელი პარტნიორების სრულფასოვანი ინტეგრაცია. დღეს, როცა რუსეთი განაგრძობს ცივი ომის მეთოდებით მოქმედებას, ალიანსისთვის პრიორიტეტული უნდა იყოს მეგობრებთან კიდევ უფრო დაახლოვება; იმედია ახლადგახსნილი ცენტრი, შეძლებს იტვირთოს ეს მნიშვნელოვანი ფუნქცია.

Comments

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *