18 მაისს, ქალაქ ბათუმში, “კავკასიური სახლის” ორგანიზებით, იწყება ლექციათა კურსი ,,კონფლიქტებისა და განვითარების ყოველწლიური უნივერსიტეტის“ ფარგლებში. უნივერსიტეტი საქართველოდან, უკრაინიდან, რუსეთიდან, მოლდოვიდან და ევროკავშირის ქვეყნებიდან 30–ზე მეტ ახალგაზრდას მასპინძლობს.
6 დღის განმავლობაში, რეგიონიდან და ევროპიდან მოწვეული მომხსენებლები, ქართველ ლექტორებთან ერთად წაიკითხავენ ლექციებს კონფლიქტების შესახებ. გარდა თეორიული ნაწილისა, პროგრამაში გათვალისწინებულია პოსტსაბჭოთა სივრცესა და ევროპაში არსებული ცალკეული ეთნიკური და ეთნო-პოლიტიკური კონფლიქტების განხილვა. განსაკუთრებული ყურადღება დაეთმობა უკრაინაში მიმდინარე მოვლენების გაანალიზებას. უნივერსიტეტი ხორციელდება პროექტის „უკრაინა – გამოსავლის ძიებაში დიალოგის გზით“ ფარგლებში.
უნივერსიტეტის მიზანია უკრაინა–რუსეთს შორის მიმდინარე კონფლიქტის გააზრება და ამ კონფლიქტის მშვიდობიანი ტრანსფორმაციის ხელშეწყობა. უნივერსიტეტი, კონფლიქტების შესახებ თეორიული თუ პრაქტიკული ცოდნის ამაღლებასთან ერთად, ორიენტირებულია შექმნას თავისუფალი სააზროვნო სივრცე, სადაც მხარეთა შორის რაციონალური დისკუსიების წარმართვით შესაძლებელი გახდება რუსს და უკრაინელ მომავალ ლიდერებსა და პოტენციურ გადაწყვეტილების მიმღებ პირებს შორის თანაშრობლობის ხელშეწყობა და კონფლიქტის მოგვარების გზების ერთიანი ძალისხმევით ძიება. აღსანიშნავია, რომ მშვიდობისა და განვითარების ხელშეწყობის კუთხით კავკასიური სახლის აქტივობებში საერთაშორისო მასშტაბის უნივერსიტეტის იდეა თვისებრივად ახალია და საკმაოდ დიდი გამოხმაურება მოჰყვა ქართულ და არა მხოლოდ ქართულ საზოგადოებაში.
,,კონფლიქტების და განვითარების ყოველწლიური უნივერსიტეტი“ 24 მაისამდე გასტანს, რომლის ფარგლებშიც 20–მდე ლექციის ჩატარებაა დაგეგმილი.
პროექტი ხორცილედება კივეში დიდი ბრიტანეთის საელჩოს ფინანსური მხარდაჭერით.
