ხელშეკრულება აფხაზეთსა და რუსეთს შორის მოკავშირეობისა და ინტეგრაციის შესახებ

2014 წლის 13 ოქტომბერს „აფხაზეთის რეპუბლიკასა“ და რუსეთის ფედერაციას შორის მოკავშირეობისა და ინტეგრაციის ხელშეკრულების სამუშაო ვერსია გამოქვეყნდა. ხელშეკრულების მიხედვით მხარეები პატივს სცემენ ერთმანეთის სახელმწიფო სუვერენიტეტს და ტერიტორიულ მთლიანობას. მოკავშირეობა და ინტეგრაცია გულისხმობს შეთანხმებული საგარეო პოლიტიკის გატარებას, საერთო უსაფრთხოების სივრცის შექმნას და ერთიანი კულტურულ-სოციალური სივრცის შენარჩუნებას. ხელშეკრულება ითვალისწინებს საზღვრების ერთობლივ დაცვას და საერთო სამხედრო შენაერთების ფორმირებას. მხარეები ვალდებულებას იღებენ, საჭიროების შემთხვევაში ერთმანეთს სამხედრო დახმარება აღმოუჩინონ.
ხელშეკრულების პროექტში გამოქვენებას შესაბამისი რეაქცია მოჰყვა თბილისში: რუსეთის ეს ნაბიჯი შეფასდა, როგორც საქართველოს ტერიტორიის ანექსიისკენ გადადგმული კიდევ ერთი ნაბიჯი.
16 ოქტომბერს ხაჯიმბა აფხაზ დეპუტატებს შეხვდა აღნიშნული ხელშეკრულების სამუშაო ვერსიის განსახილველად. როგორც ე.წ. პარლამენტის თავმჯდომარემ ვალერი ბგანბამ განაცხადა, შეთავაზებული ხელშეკრულების ბევრი პუნქტი არ მოდის თავსებადობაში აფხაზურ მისწრაფებებთან, რადგან ის „აფხაზეთის სუვერენიტეტის დაკარგვას ეხება“, ამიტომ სოხუმი მოსკოვს ხელშეკრულების საკუთარ ვერსიას შესთავაზებს.
მოგვიანებით თავისი პოზიცია დააფიქსირა აგრეთვე ევროკომისარმა გაფართოებისა და სამეზობლო პოლიტიკის საკითხებში, შტეფან ფულემ, რომელმაც განაცხადა, რომ აღნიშნულ საკითხზე პოლიტიკური კონსულტაციები უნდა შედგეს. როგორც საგარეო საქმეთა სამინისტროს მიერ გავრცელებულ განცხადებაშია ნათქვამი, ევროკავშირის წევრი ქვეყნების საგარეო საქმეთა მინისტრების არაფორმალურ შეხვედრაზე ევროკომისარმა კიდევ ერთხელ დაადასტურა საქართველოს სუვერენიტეტის მიმართ ორგანიზაციის პატივისცემა.